Бугун юртдошларимиз орасида тадбиркорликка, айниқса, қишлоқ хўжалигидаги баъзи соҳаларга қизиқиш анча юқори. Қизиғи, бу соҳаларнинг сердаромад эканлигини ҳали кўпчилик билмайди. Мисол тариқасида туяқушчиликни олайлик. Харажати қушдек, даромади туядек бўлган бу соҳага бугун бутун дунё қизиқаяпти десак муболаға бўлмайди.
Паррандачиликда туяқуш боқиш янги йўналишлардан бири бўлиб, бугун мамлакатимизнинг барча ҳудудларида ривожланиб бормоқда.
Элликқалъа туманида “Навоий” овул фуқаролар йиғини худудидаги “Бустон Страус” фермер хўжалигига 2016 йили Фарғона вилоятидан маҳаллий шароитда боқишга мулжалланган африка туяқушларидан 6 та туяқуш олиб келинган эди. Фермер хўжалиги бунга қушимча 7 минг 500 дона бройлер думбоқ жужаларини ҳам боқиб етиштирмоқда. Туяқушларга озуқа етиштириш учун туман ҳокимлиги томонидан 10 гектар ер майдони ажиратиб берилган.
Айни пайтда бу ерда 120-150 килограмм вазнга эга ва йилига 80-100 донадан жўжа очадиган туяқушлар парваришланмоқда. Баҳор ойларидан туяқуш жўжаларини очириш бошланади.
Мутахассисларнинг таъкидлашича, туяқуш 4 йилда репродуктив ёшга етади ва паррандачиликда бундай қушлар «Бридер» деб юритилади. Уларнинг ўртача тухум қўйиш ёши 10-15 йил, зотдор туяқушлар 40 йил давомида тухум қўяверади. Битта туяқуш 10-12 йил давомида қўйган тухумдан чиққан жўжа гўшти ўртача 72 тоннага етиши мумкин. Туяқуш боқишни йўлга қўйиш оилалар учун ҳам қулай ва даромадли бизнеслардан биридир.
Элликқалъа тумани ҳокимлиги ахборот хизмати.
