Учрашувда анжуманлар саройида 600 га яқин тадбиркор, ҳудудлардаги студияларда эса жами 10000 га яқин ишбилармонлар иштирок этди. Унда Президентимиз тадбиркорликни қўллаб-қувватлаш, тизимли муаммоларни бартараф этиш чора-тадбирларини муҳокама қилди, тадбиркорларнинг таклифларини эшитди.
Мазкур тадбир арафасида давлатимиз раҳбарининг “Мамлакатда ишбилармонлик муҳитини ривожлантиришга муносиб ҳисса қўшиб келаётган тадбиркорларнинг бир гуруҳига миннатдорчилик билдириш тўғрисида”ги фармойиши эълон қилинди.
Фармойишга мувофиқ, иқтисодиётимизнинг равнақ топиши ва юртимиз барқарор ривожланиши, ишбилармонлик муҳитини яхшилаш, республиканинг экспорт салоҳиятини ошириш, янги иш ўринлари яратиш, бюджет барқарорлигини таъминлаш ҳамда аҳолини ижтимоий қўллаб-қувватлашда муносиб ҳисса қўшиб келаётган бир гуруҳ тадбиркорларга миннатдорчилик билдирилди.
Улар орасида Қорақалпоғистон Республикасидан «Karakalpaksement» МЧЖ раҳбари Ш.Азизов, «Atiyaj-gulzar» МЧЖ раҳбари А.Мустафаев “Энг кўп иш жойлари яратган тадбиркор” сифатида, «Stroy vektor plus» хусусий корхонаси раҳбари И.Панаев, «Titan cement» МЧЖ қўшма корхонаси раҳбари Б.Нурлибаева “Энг яхши солиқ тўловчи” сифатида, «To’rtko’l shisha idishlari» МЧЖ раҳбари Х.Юлдашев “Энг яхши экспортёр” сифатида Ўзбекистон Республикаси Президентининг миннатдорчилик хатини олди.
Қорақалпоғистон Республикаси Жўқорғи Кенгеси Раиси М.Камалов «Atiyaj-gulzar» МЧЖ раҳбари А.Мустафаев, «Stroy vektor plus» хусусий корхонаси раҳбари И.Панаев ва «Titan cement» МЧЖ қўшма корхонаси раҳбари Б.Нурлибаевага Президентимизнинг миннатдорчилик хатларини топширди.
