Бобомерос юрт меҳри қуёшдек порлаб,
Таклиф этди дўстлар бағрига чорлаб,
Қониб ўпдим тупроғин яйраб қўйиб лаб,
Раҳматларим беҳисоб Элликка менинг,
Аҳли эли Алпомиш белликка менинг.
Бу мавзеда бисёрдир мозий эҳсони,
Икки юз элликдан кўп кўҳна қўрғони.
Бугунги авлодга Оллоҳ армуғони.
Раҳматларим беҳисоб Элликка менинг,
Аҳли эли Алпомиш белликка менинг.
Борган Жайҳун сувлари гулистон этиб,
Бир ирмоқ то Қўрғошин қалъага етиб,
Кўрганман ўзанин саҳни бўйлаб кетиб.
Раҳматларим беҳисоб Элликка менинг,
Аҳли эли Алпомиш белликка менинг.
Аён, бунда нур тараб тонглар отгани,
Боғлари ноз-неъмат, болга ботгани,
Бағринда ҳануз дур тўла кон ётгани.
Раҳматларим беҳисоб Элликка менинг,
Аҳли эли Алпомиш белликка менинг.
Қалъаларин келмоқда авлод авайлаб,
Номларин бир-бир санамадим атайлаб,
Яйрамоқдамиз кўзларга тўтиё айлаб.
Раҳматларим беҳисоб Элликка менинг,
Аҳли эли Алпомиш белликка менинг.
Ётди бу замин асрлар тупроқ остида,
Қизилқум барханларин баланд-пастида,
Бел боғлади эл яна яшнатмоқ қасдида.
Раҳматларим беҳисоб Элликка менинг,
Аҳли эли Алпомиш белликка менинг.
Элликқалъа бўйин кўрсатди очунда,
Қирқ йилдан сал кўпроқ сана ичинда,
Бунда бўстон қайтадан яралди чиндан.
Раҳматларим беҳисоб Элликка менинг,
Аҳли эли Алпомиш белликка менинг.
Бўлди қирқ уч йилда юксалиб шони,
Қорақалпоқ ўйпотин жаннат макони,
Бугун элининг унга бахшида жони.
Раҳматларим беҳисоб Элликка менинг,
Аҳли эли Алпомиш белликка менинг.
Неча кутдик бу масканда янги йилни,
Дўсту ёр шоду хандон яйратиб дилни,
Бахтини тиладик бу навқирон элни.
Раҳматларим беҳисоб Элликка менинг,
Аҳли эли Алпомиш белликка менинг.
Демак, бахту саодатдан берган дарак,
Келаётган тоза йил барчага муборак,
Еганимиз бўлсин полов, гўмма-барак,
Йўлдош бўлиб ҳаммага “Қуръон”, “Таборак”.
Раҳматларим беҳисоб Элликка менинг,
Аҳли эли Алпомиш белликка менинг.
Вирус деган балолар йироққа қочсин,
Юртбошимиз умри юзлардан ошсин,
Сайдаматга шон-шараф қучоқлар очсин.
Раҳматларим беҳисоб Элликка менинг,
Аҳли эли Алпомиш белликка менинг.
Дарёдай тўлиб-тошиб айлайман бот-бот,
Янги йил ила бу юрт халқин муборакбод,
Заминида мангу гуллаб турсин ҳаёт.
Раҳматларим беҳисоб Элликка менинг,
Аҳли эли Алпомиш белликка менинг.
Яратган Ҳақ тўкин қилиб шаҳдингизни,
Тиллодан айлаб тож ила тахтингизни,
Ошиқ Эркин куйлаб юрсин бахтингизни.
Раҳматларим беҳисоб Элликка менинг,
Эл-элоти Алпомиш белликка менинг.
ОШИҚ ЭРКИН
19.12.2020.
